母乳餵哺友善工作間：支持在職母乳餵哺媽媽
劇本
旁白：母乳餵哺友善工作間：支持在職母乳餵哺媽媽
旁白：一位人力資源顧問喺辦公室正在為管理人員製作培訓影片，講解點樣喺工作間支持母乳餵哺……
顧問：要建立一個母乳餵哺友善工作間，你可以給予員工時間、提供空間同埋相關設施，畀佢地喺工作間泵奶！當然，主管同埋同事嘅支持都係成功嘅關鍵。
顧問：等我哋一齊嚟睇下你嘅公司可以點樣“打造” 成一個支持母乳餵哺員工嘅環境。
顧問：給予員工授乳時段。
顧問：你可以容許員工喺自己嘅工作時間加入授乳時段。喺員工分娩後一年內，喺 8個鐘頭嘅工作時間裏面畀員工兩節，每節大概 30 分鐘嘅授乳時段。之後，就可以彈性處理。
顧問：授乳時段係有薪工時，唔使要求員工提供授乳證明㗎。
顧問：同時，員工亦唔需要加班去彌補泵奶所用嘅時間。
顧問：提供擠奶空間。
顧問：你可以為員工提供一個唔需要好大，但最緊要嘅係有私隱嘅空間泵奶。
旁白：跟住，顧問揮動手指，喺工作間出現咗一間集乳室，並且介紹裏面應有嘅基本設施。
顧問：一間專屬嘅集乳室當然係員工“媽媽時間” 嘅理想地點。
顧問：集乳室必須乾淨，有一張舒適、有靠背嘅櫈。
顧問：一張細檯，用嚟放置泵奶所需物品。
顧問：一個為泵奶器供電嘅插座，插座嘅位置要唔好畀家俬遮住。記得，房門要有內部門鎖呀。
顧問：如果可以嘅話，提供洗手盤、梘液或者酒精搓手液同埋儲物櫃就更理想嘞。
旁白：一個母乳餵哺員工喺集乳室裏面好舒適咁泵奶。
顧問：如果唔可以設置一個專屬嘅集乳室，你可以發揮創意，試下利用現有資源！
旁白：顧問隨後揮動手指，將會議室改造成集乳室。
顧問：你可以畀員工暫時使用現有空間，例如會議室或者多功能房間，你亦可以預留一啲時段畀佢哋喺呢啲房間泵奶。
旁白：然後，顧問再次揮動手指，將一個角落變成有屏風嘅集乳角落。
顧問：又或者喺一個乾淨安靜嘅角落設置一個屏風或者簾幕，畀員工泵奶。仲要確保喺呢個空間外面當眼位置貼上“使用中”或者“媽媽時間” 嘅清晰標示牌。
顧問：除咗辦公室環境，我哋可以為其他行業嘅母乳餵哺員工提供更多地點去泵奶，例如服裝零售店舖嘅試身室對售貨員工嚟講係一個唔錯嘅選擇；你亦可安排餐飲員工使用餐廳入面空置嘅貴賓房。
要記住，基於衛生理由，洗手間並唔係一個適合泵奶嘅地方。
顧問：如果以上嘅方法都行唔通，你可以容許員工喺授乳時段使用附近嘅社區育嬰間。
顧問：喺儲存母乳方面，一個小型雪櫃或者冷藏箱已經足夠。至於專屬儲存母乳嘅雪櫃並唔係必須嘅。
顧問：不過，為咗保障食物衛生及安全，要預留雪櫃頂層較入嘅位置儲存母乳，防止食物交叉污染。
顧問：其實，只需要提供剛才所講嘅措施，就可以令母乳餵哺嘅員工感受到你嘅支持嘞。
顧問：依家香港嘅女性，無論從事邊種職業，都受到《性別歧視條例》保障，令佢哋唔會因為餵哺母乳而受到歧視同騷擾。
就等我哋一齊去建立母乳餵哺友善工作間啦！
旁白：如果你想支持母乳餵哺，並成為母乳餵哺友善工作間，請致電 2836 2913，聯絡聯合國兒童基金香港委員會嘅“SayYesToBreastfeeding” 計劃。
旁白：想了解更多有關母乳餵哺友善工作間嘅資訊，請收睇相關系列嘅影片。
旁白：你亦可瀏覽衞生署家庭健康服務網頁www.fhs.gov.hk，並參閱有關單張。
衞生署家庭健康服務製作。