母乳餵哺友善工作間—常見問題
劇本
旁白：母乳餵哺友善工作間—常見問題
旁白：幾位管理人員完成咗支持母乳餵哺友善工作間嘅線上培訓之後，人力資源顧問同佢哋分享一啲常見嘅情況同解答佢哋嘅疑問。張主管開始提問……
張主管：我哋應該點樣開始建立母乳餵哺友善工作間呢？
顧問： 首先，要訂立一套清晰嘅書面政策去加強管理層同各員工嘅溝通，以及統一實行相關嘅措施。
顧問：一個充分支持母乳餵哺嘅工作環境係需要所有員工互相量解，同時處理各方關心嘅問題。
旁白：聽取意見，提供培訓。
顧問：主管要通知所有職級嘅員工有關母乳餵哺友善工作間嘅政策，確保佢地知道措施嘅詳情，仲要提供培訓畀負責執行政策嘅同事。
我哋亦鼓勵懷孕員工喺分娩之前，盡早同主管表達佢哋返工之後繼續餵母乳嘅意願，等雙方有足夠時間做準備。
主管同母乳餵哺員工以及其他同事之間最重要係有坦誠嘅溝通。經驗話畀我哋知，大部分嘅員工不論性別，都支持母乳餵哺友善工作間。如果有部分員工認為措施唔公平，可以畀佢哋知道呢啲只係暫時性，長遠嚟講亦會為大家帶嚟益處。
旁白：跟住陳經理問…..
陳經理：如果員工要求更頻密或者較長嘅授乳時間，我可以點樣做呀？
顧問：你可以根據實際情況作出彈性處理，有啲啱啱重返工作崗位嘅媽媽可能要適應新嘅泵奶環境而需要更頻密或者較長嘅授乳時段，佢哋可以考慮利用工餘時間，例如午膳嘅時候去泵奶。
陳經理：如果員工已經餵母乳超過一年，佢每日係咪仲可以有兩節授乳時段呀？
顧問：滿一歲嘅小朋友已經可以食多種食物，佢哋每日食母乳嘅分量會少咗，所以媽媽餵奶或者泵奶嘅次數亦都相應減少。喺呢個階段，大部分餵母乳嘅媽媽每日返工時只需要泵奶一次。你可以作出靈活安排，去照顧個別員工對持續母乳餵哺嘅需要。
旁白：喺呢個時候，張主管又再問…..
張主管：咁我地又可以點樣支持需要外勤工作嘅母乳餵哺員工呢？
顧問：你可以畀員工使用附近嘅社區育嬰設施，或者彈性處理佢哋嘅工作安排，例如轉換工作崗位或者暫時轉為兼職。
呢啲臨時措施可以隨住佢哋小朋友長大而逐漸改變。
顧問：總括嚟講，母乳餵哺對媽媽，BB同埋公司都帶嚟好多嘅益處。
顧問：依家香港嘅女性，無論從事邊種職業，都受到《性別歧視條例》保障，令佢哋唔會因為餵哺母乳而受到歧視同騷擾。
就等我哋一齊去建立母乳餵哺友善工作間啦！
旁白：如果你想支持母乳餵哺，並成為母乳餵哺友善工作間，請致電 2836 2913，聯絡聯合國兒童基金香港委員會嘅“SayYesToBreastfeeding” 計劃。
旁白：想了解更多有關母乳餵哺友善工作間嘅資訊，請收睇相關系列嘅影片。
旁白：你亦可瀏覽衞生署家庭健康服務網頁www.fhs.gov.hk，並參閱有關單張。
衞生署家庭健康服務製作。