母乳餵哺友善工作間—簡介
劇本
旁白：母乳餵哺友善工作間—簡介。
旁白︰一位有豐富工作經驗嘅懷孕員工想喺BB出世之後繼續餵母乳，而選擇唔再全職返工，於是佢向經理遞交辭職信。
經理覺得好疑惑。佢喺電腦搜尋“母乳餵哺” “工作間”。
一位人力資源顧問出現喺聊天室，經理就同佢傾起上嚟……
經理：我知道依家越嚟越多媽媽想畀BB食耐啲母乳，咁點解僱主要喺工作間支持佢哋呢？
顧問：母乳餵哺唔單止有助BB嘅腸道健康同大腦發展，仲可以減低好多疾病嘅風險！
顧問：雖然母乳餵哺有好多好處，但係唔少媽媽要喺返工之後繼續餵母乳，都會覺得有困難。
旁白：一位員工正喺度為揾泵奶嘅地方而苦惱。
顧問：實行母乳餵哺友善工作間措施對於母乳餵哺員工同你嘅公司都有好處。
顧問：呢個措施不但可以幫公司建立聲譽，亦都可以展示公司對員工嘅關心。
顧問：加上，食母乳嘅BB會比較健康，睇醫生都少啲，因此你嘅員工需要請假嚟照顧唔舒服嘅小朋友亦會少啲。
顧問：經驗豐富嘅員工係公司重要嘅資產，佢哋做得開心，員工流失率就自然減低，因而減少公司喺培訓新員工同請臨時員工所需嘅時間同費用。
顧問：當母乳餵哺員工感受到公司嘅支持同重視，就會提高佢哋嘅生產力、員工士氣同忠誠度，因而為公司同員工帶嚟雙贏局面。
經理：咁我應該點樣去建立一個母乳餵哺友善工作間？
顧問：你要做嘅就係呢啲基本重點：
顧問： 給予授乳時段：喺員工分娩後每日為佢哋提供授乳時段。
顧問：提供泵奶空間：私隱係非常重要嘅！確保提供一個有私隱嘅泵奶地方，加埋一個可以畀員工儲存母乳嘅雪櫃。
顧問：最後，鼓勵員工支持母乳餵哺亦都係非常重要，所以要制訂書面政策，加強管理層同員工之間嘅溝通。
旁白：經理點頭，明白實行母乳餵哺友善工作間應有嘅措施。
顧問：依家香港嘅女性，無論從事邊種職業，都受到《性別歧視條例》保障，令佢哋唔會因為餵哺母乳而受到歧視同騷擾。
就等我哋一齊去建立母乳餵哺友善工作間啦！
旁白：如果你想支持母乳餵哺，並成為母乳餵哺友善工作間，請致電 2836 2913，聯絡聯合國兒童基金香港委員會嘅“SayYesToBreastfeeding” 計劃。
旁白：想了解更多有關母乳餵哺友善工作間嘅資訊，請收睇相關系列嘅影片。
旁白：你亦可瀏覽衞生署家庭健康服務網頁www.fhs.gov.hk，並參閱有關單張。
衞生署家庭健康服務製作。